भद्रपुर/ झापाको केचना– चारआली सडक खण्डको निर्माण कार्य सुरु हुने भएको छ । नेपाल सरकार भौतिक पूर्वाधार तथा यातायात मन्त्रालय अन्तर्गत सडक विभागको हुलाकी राजमार्ग परियोजनाले ९० करोड रुपैयाँको लागतमा ७ मिटर चौडाइको सडक निर्माण कार्य यसै आर्थिक वर्षबाट थालनी गर्ने भएको हो ।
चार वर्ष अगाडि भारत सरकारको आर्थिक सहयोगमा भारतीय निर्माण कम्पनी मार्फत निर्माण सम्पन्न गर्ने गरी कार्य थालेको भए पनि सडक निर्माण कार्य अलपत्र छोडेर ठेकेदार भागेपछि निर्माण सम्झौता खारेज गरी नेपाल सरकार मार्फत काम गर्न आर्थिक सहयोगको वातावरण बनिएपछि पहिलो चरणको टेण्डर लागिसकेकाले सडक निर्माण कार्य सञ्चालनमा आउने भएको हो ।
सो सडकखण्डको दुई चरणमा खोलिने टेण्डर मध्ये चारआलीदेखि पृथ्वीनगरको सोमबारेसम्मको पहिलो चरणको टेण्डर लागिसकेको र दोस्रो चरणको टेण्डर सोमबारेदेखि केचनासम्मको यहि
भदौ तेस्रो साता भित्र खोल्ने निश्चित भएको नेपाली काँग्रेस झापा क्षेत्र नम्वर ३ का सभापति गणेश पोखरेलले जानकारी दिए । सडक निर्माण पूरा भएपछि झापा सदरमुकाम भद्रपुर दक्षिणमा रहेका आधा दर्जन बढी गाउँ विकास समितिका बासिन्दालाई सहज यातायातको पहुँच पुग्ने छ ।