दमक/विभिन्न मागहरू राखेर देशैभरि भईरहेका बन्द, हड्तालले निजी क्षेत्रसंगै सर्वसाधारणहरूको जनजीवन प्रभावित भएको भन्दै आइतबार अपरान्ह यहाँ सद्भाव र्याली निकालिएको छ ।
दमक उद्योग वाणिज्य संघको तथा स्थानीय संघसंस्थाहरूको संयुक्त आयोजनामा सहभागीहरूले सामाजिक सद्भाव कायम गरौ भन्ने आव्हानका साथ र्याली निकालिएको हो । संघको कार्यालयबाट शुरु भएको र्यालीले दमकको चौक, वजार परिक्रममा गरि स्थानीय गणतन्त्र चौकमा आएर कोणसभा गरि समापन गरिएको थियो ।

(तस्वीरः र्यालीमा सहभागीहरू ।)

कोणसभामा बक्ताहरूले बन्द, हड्तालले मुलुक आक्रान्त भएको तथा पछिल्ला समय विभिन्न माग राखेर भएका आन्दोलनले जातीय सद्भाव खलल पुर्याँएको भन्दै यस्ता गतिविधी हुन नदिन सवै पक्ष जिम्मेवार हुनुपर्नेमा जोड दिएका थिए । कार्यक्रममा नेपाल उद्योग वाणिज्य संघका केन्द्रीय सदस्य एवं दमक उद्योग वाणिज्य संघका अध्यक्ष प्रकाश प्रसाईले बन्द, हड्तालले निजी क्षेत्र सवैभन्दा मारमा परेकाले यस्ता बन्द, हड्ताल सधैका लागि बन्द गरिनुपर्ने जोड दिए । उनले भने, –‘राजनीतिक माग राखेर गरिने यस्ता हड्ताल अव निषेध गरिनु पर्ने कानुन बन्नुपर्छ ।’
संघका पूर्व अध्यक्ष घनेन्द्रराज योङ्याले बन्द, हड्ताल सधैका लागी वन्द गरि सामाजिक एकता तथा सद्भाव बृद्धि गर्न लाग्नुपर्ने बताएका थिए । कोणसभामा नेपाल मानवअधिकार संगठनका पूर्वाञ्चल संयोजक डा. केपी सुवेदीले आफना माग सम्बोधन गराउन शान्तिपूर्ण आन्दोलन गर्नुपर्ने तथा राज्य पक्षले आन्दोलनकारीहरूले उठाएका अधिकतम वार्ताबाट समस्या सुल्झाउन पहल गरिनुपर्ने समेत सुझाउ दिएका थिए । र्यालीमा विभिन्न क्षेत्रका पेशाकर्मी, मानवअधिकारकर्मी, विद्यालयका विद्यार्थीहरूको उल्लेखीय सहभागिता रहेको थियो । यसअघि एमाले निकट अखिल नेपाल महिला संघले समेत दमकमा साता दिन अघि सद्भाव र्याली निकालिएको थियो ।