बिर्तामोड/ झापाका विभिन्न राजनीतिक दलहरुले जिल्लाका शिक्षण संस्थालाई बन्द हड्ताल मुक्त गरी शान्ति क्षेत्र बनाउने प्रतिबद्धता व्यक्त गरेका छन् ।
झापाको बिर्तामोडमा मंगलबार संवाद समूह सचिवालयको संयोजनमा भएको छलफलमा सहभागी राजनीतिक दल तथा विभिन्न आन्दोलनरत घटक र सरोकारवालाहरुले त्यस्तो प्रतिबद्धता व्यक्त गरेका हुन् ।
त्यस्तै भदौ २४ र २५ गते लिम्बुवान संयुक्त संघर्ष समितिले आव्हान गरेको आमहड्तालमा झापाका शिक्षण संस्थालाई निर्वाध सञ्चालनको वातावरण बनाउन उक्त संघर्ष समितिलाई झापाका राजनीतिक दल, आन्दोलनरत अन्य मोर्चा, प्याब्सन, एनप्याब्सन, हिसान, मानवअधिकारवादीहरुले आग्रह गरेका छन् । छलफलमा सहभागी राजनीतिक दलहरुले आन्दोलनरत दल र मोर्चाका जायज माग सम्बोधनका लागि वार्ता
र संवादको प्रक्रिया थाल्न समेत सरकारलाई आग्रह गरेका छन् ।
उक्त प्रतिबद्धता तथा निर्णयमा नेपाली कांग्रेसका उपसभापति देउमान थेवे, सहसचिव लक्ष्मण खड्का, नेकपा एमालेका एकराज कार्की, नारायण पोखरेल, एकीकृत नेकपा माओवादीका उपाध्यक्ष राजु आचार्य अग्नि,कोचिला थारुवान तराई मधेश संघर्ष समिति झापाका संयोजक तमलोपाका अध्यक्ष त्रिनारायण राजवंशी, कोचिला ग्राभुर फ्रन्टका अध्यक्ष खकेन राजवंशीले हस्ताक्षर गरेका छन् ।
त्यस्तै मानवअधिकार प्रतिष्ठान झापाका अध्यक्ष रुपक खनाल, प्याब्सन झापाका अध्यक्ष मिलनकुमार ढुंगाना, केन्द्रीय सदस्य नारायणप्रसाद घिमिरे, एनप्याब्सनका अध्यक्ष सञ्जीव राईले समेत हस्ताक्षर गरेका छन् ।
छलफलमा प्याब्सनका मोहन सुब्बा, सञ्जीव प्रधान, गौरीमान फागो, ज्ञानकुमार थलङ, पेम्बा लामा, श्रवण पोखरेल, कोषराज प्याकुरेल, गुरुभक्त न्यौपाने, हरिकृष्ण पाठक, अजयआले मगर, शिक्षक संघका नारायणप्रसाद दाहालले बालबालिकाको पढ्न पाउने अधिकारको रक्षा गर्दै शिक्षा क्षेत्रलाई शान्ति क्षेत्र घोषणा गर्नुपर्नेमा जोड दिएका थिए । छलफलको सहजीकरण संवाद समूह सचिवालयका संयोजक अधिवक्ता दीपेन्द्र भट्टराई र अधिवक्ता खगेन्द्र खरेलले गरेका थिए ।