दमक/ अब बन्ने संविधान सहकारी मैत्री हुन आवश्यक रहेको सहकारी क्षेत्रका अगुवाहरुले बताएका छन् । नेपालको चारखम्बे अर्थतन्त्रको एक खम्बा मानिएको सहकारी क्षेत्रलाई अझ व्यवस्थित र मर्यादित बनाउन संविधानमा नै सुनिश्चित गराईनुपर्नेमा उनीहरुले जोड दिएका छन् । 
मेची सहकारी संस्था दमकले शुक्रबार आयोजना गरेको १९ औं बार्षिक उत्सव तथा २१ औं साधारणसभालाई सम्वोधन गदै सहकारी क्षेत्रका अगुवाहरुले नेपालको ग्रामीण, सामाजिक तथा आर्थिक विकासको आधार सहकारी क्षेत्र भएको बताएका थिए । कार्यक्रममा राष्ट्रिय सहकारी संघका उपाध्यक्ष मिनराज कडेलले सहकारीको मूल्य र मान्यतालाई बिर्सिएर ब्यक्तिवादी भए सहकारी क्षेत्रनै धराशायी हुने बताएका थिए । कार्यक्रमका प्रमुख अतिथि समेत रहेका कडेलले विश्वका सवा अर्ब जनसंख्या सहकारीमा आवद्ध भैसकेको बर्तमान अवस्थामा सहकारी क्षेत्र मुलुकको आर्थिक बिकासको आधार भएको उल्लेख गरेका थिए ।
दमक– ८ स्थित दाहाल प्रतिष्ठानमा भएको सभाहलमा सम्पन्न साधारणसभामा केन्द्रीय बचत तथा ऋण सहकारी संघका सञ्चालक केशव पोखरेलले जोखिम ब्यवस्थापनमा सहकारीले ध्यान दिनुपर्ने बताए । सहकारी क्षेत्रको कोष ब्यवस्थापन कमजोर भए यसको सिधाअसर सहकारी
क्षेत्रलाई नै पर्ने भएकाले यस्ता विषयमा सञ्चालकहरु सचेत रहन आवश्यक रहेको पोखरेलको भनाई रहेको थियो ।
यस्तै कार्यक्रममा डिभिजन सहकारी कार्यालय झापाका प्रमुख माधव पोखरेल,संस्थाका अध्यक्ष रोमनाथ ओली लगायतकाले सहकारीको विकासका बारेमा बोलेका थिए ।  सोही अवसरमा संस्थाका पूर्व अध्यक्ष स्व.गणेश बस्नेत स्मृति सहकारी अभियन्ता पुरस्कारबाट यज्ञराज ढुङगेललाई पुरस्कृत गरिएको थियो । यसैगरी गणेश बस्नेत पत्रकारिता पुरस्कारबाट हिमशिखर टेलिभजनका समाचार संयोजक गोपाल झापाली, सप्तरङगी एफएम दमकका संवाददाता मनकुमार गदाल र सञ्चार संस्था तर्फ रेडियो इन्दे्रणी उर्लावारीलाई पुरस्कृत गरिएको थियो । कार्यक्रममा उत्कृष्ट कर्मचारीहरु तर्फ शसी न्यौपाने, भेषराज थापा लाई पुरस्कृत गरेको थियो । त्यस्तै संस्थाका उत्कृष्ट कारोवार गर्ने सदस्य , उत्कृष्ट किसान, उत्कृष्ट बचतकर्ता, सदस्यका सन्तान मध्येका उत्कृष्ट विद्यार्थी लगायतलाई पुरस्कृत गरिएको थियो ।