उर्लाबारी/ मोरङको उर्लाबारीस्थित उर्लाबारी उद्योग बाणिज्य संघको आगामी भदौ १९ र २० गते हुने चुनावी साधरणसभाका लागि नेपाली कांग्रेसले आफ्नो कार्यकर्ताको प्यानल घोषणा गरेको छ ।
उर्लाबारीस्थित पार्टी कार्यालयमा पत्रकार सम्मेलनको आयोजना गरी कांग्रेसले वाणिज्य संघमा आफू निकट व्यापारीहरूको एकल प्यानल घोषणा गरेको हो । सर्वसम्मत नेतृत्व चयनका लागि सहमतिको प्रयास गरे पनि सहमति हुन नसकेको कांग्रेसकोले एकल प्यानल बनाउन परेको बार्ता टोलीका संयोजक भोलामान श्रेष्ठले बताए ।
नेतृत्व चयनका लागि भएको छलफलमा एकीकृत माओवादीले अध्यक्ष पद छाड्न तयार नभएको तथा एमालेले लचकता देखाए पनि सहमति हुन नसकेको श्रेष्ठले दावी गरे । कांग्रेसको प्यानलबाट बाणिज्य संघको अध्यक्षमा प्रितम खड्गी, बरिष्ठ उपाध्यक्षमा तारामान सिरिङ लिम्बू, उद्योग उपाध्यक्षमा रामबाबु चौधरी, बाणिज्य उपाध्यक्षमा सचिन शाक्य, महासचिवमा प्रदिप गौतम (मिलन), उद्योग सचिवमा दिलकुमार श्रेष्ठ, बाणिज्य सचिवमा केशब सुबेदी र कोषाध्यक्षमा बिशाल बाहेतीले उम्मेद्वारी दिने सो पार्टीले जनाएको छ ।
यस्तै सदस्यहरूमा बिष्णु गुरागाईं, बद्री खरेल, भोगल्टु शाह, संगीता अधिकारी र मनोज श्रेष्ठले उम्मेद्वारी दिने जनाइएको छ । बाणिज्य संघको अध्यक्षका लागि एकिकृत माओबादी निकट भरत भट्टराई र वर्तमान अध्यक्ष धर्मराज शाक्यले पनि उम्मेद्वारी घोषणा गरिसकेका छन् । एमालेका तर्फबाट अध्यक्षका लागि सहमति गर्न भनी खाली राखेर प्रमुख ५ पदसहित ८ वटा पदमा उम्मेद्वारी दिने घोषणा यस अघि नै गरिसकेको छ ।