झापा/ गायक सञ्जय तुम्रोकको नयाँ म्युजिक भिडियो “तिमी बिना” हालै सार्वजनिक भएको छ । ‘सेवारो’ एल्बममा संग्रहित “तिमी बिना” मा लोकेन्द्र लेखकको शब्द, रुपक चौधरीको म्युजिक र चन्दु गोर्खालीको एरेञ्ज रहेको गीतलाई परफर्मिंग आर्ट क्रियशनले भिडियो निर्माण गरेको हो ।
भिडियोमा अहिलेका चर्चित मोडेल रञ्जन रिजाल र सुरबिना कार्कीको मोडेलिङ्ग रहेको छ । पछिल्लो समय युवा पुस्तालाई मध्यनजर गरेर भिडियो निर्माणमा ब्यस्त रहेका कमल मगरले निर्देशन गरेको भिडियोमा सम्पादन पनि कमलकै रहेको छ । जसमा उनले आफ्नो क्रियशनलाई देखाउन खोजेका छन् । भिडियोलाई ज्ञानेन्द्र शर्माले खिचेका हुन् । पूर्वेली गीतमा चर्चा बटुलेका गायक तुम्रोकले यो भिडियोलाइ पनि दर्शकले मन पराउने विश्वास गरेका छन् ।
सञ्जय रेडियो नेपालले हरेक वर्ष आयोजना गर्ने राष्ट्रव्यापी गीत प्रतियोगिता अन्तर्गत २०६३ सालको आधुनिक गीत प्रतियोगितामा प्रथम भएका थिए । उनले हालसम्म सात सयभन्दा बढी गीतमा स्वर दिइसकेका छन् । उनी अहिले महेन्द्र पुलिस क्लबमा आबद्ध छन् ।