दमक/संघीय लिम्बुवान पार्टी नेपालले नामांकन विनाको संघीयताको खाकाको विरोध जनाएको छ । चार दलीय सहमतिबाट ल्याइएको ६ प्रदेशको खाकाप्रति पार्टीले औपचारिक रुपमा विरोध जनाएको हो । पार्टीले सिमाङ्कन बिनाको संघीयताको खाका समेत उपयुक्त नभएको ठहर गरेको छ ।

पूर्वका नौ जिल्लालाई आत्मनिर्णयको अधिकारसहितको लिम्बुवान राज्यको माग गर्दे आएको सो पार्टीले ६ प्रदेशको अवधारणाप्रति आन्दोलन सशक्त बनाउने उद्घोष गरेका थिए ।
सोमबार दमकमा पत्रकार सम्मेलन गरी पार्टीका केन्द्रीय अध्यक्ष कुमार लिङ्देनले नामाङ्कन बिनाको संघीयताको खाकाप्रति आपत्ति जनाउँदै आफूहरूलाई सो खाका मान्य नभएको बताए । अध्यक्ष लिङ्देनले भने–‘सार्वजनिक गरिएको संघीयताको खाका पञ्चायतले ल्याएको पाँच विकास क्षेत्र जस्तै मात्र हो ।’ पार्टीले उठाएको अरुण पूर्वका नौ जिल्लालाई लिम्बुवान राज्य बनाउनुपर्ने एजेण्डा यथावत रहेको र अव आन्दोलन चर्काउने लिङ्देनले जोड थियो । अरुण पूर्वका नौ जिल्ला भन्दा बढी चौध जिल्लालाई नै पूर्वी प्रदेशको प्रस्ताव गरिएको छ नी ? भन्ने पत्रकारको जिज्ञासामा
लिङ्देनले लिम्बुवानले उठाएको नौ जिल्ला नै भौगोलिक आधारले उपयुक्त भएको दावी गरे ।
पत्रकार सम्मेलनमा पार्टीका अर्का वरिष्ठ नेता सन्जुहाङ पालुङवाले लिम्बुवान नामकरण बिनाको संघीयता आए त्यस विरुद्ध समानन्तर सरकार व्यूत्याउने चेतावनी दिए  । नामाकरण विनाको ६ प्रदेश कुनै हालतमा मान्य नभएको उनको भनाई थियो । यसैबीच दलहरूले ल्याएका ६ प्रदेशको खाका प्रति विरोध जनाउदै लिम्बुवानले अरुण पूर्वका नौ वटा जिल्लाहरूमा प्रदेशको खाका जलाउने सहित सशक्त आन्दोलन गर्ने जनाएका छन् ।