दक्षिण कोरियासँग भएको पछिल्लो गोलाबारीपछि नेता उनले युद्धका लागि तयारी अवस्थामा रहन निर्देशन दिएको सरकारी समाचार संस्था केसिएनएले जनाएको छ ।

बिहीबार अबेर भएको आपदकालिन बैठकमा नेता उनले युद्ध जस्तो अवस्थाका लागि तयारी भएर बस्न सैनिकलाई निर्देशन दिनुभएको हो । दक्षिण कोरियालो आफू विरुद्ध गरिरहेको गतिविधि तत्काल नरोके सैन्य कारबाही गर्ने नेता उनले बताएको समाचारमा उल्लेख छ ।

टोकियो, श्रावण २७ - विरोधका बाबजुद जापानले पुन: परमाणु ऊर्जा उत्पादन सुरु गरेको छ । ४ वर्षअघि भूकम्प र सुनामीका कारण फुकुसिमा दाइ–इची परमाणु केन्द्रबाट रेडियोधर्मी पदार्थ चुहिएपछि ऊर्जा उत्पादन बन्द गरिएको थियो ।

क्युसु इलेक्ट्रिक पावर कम्पनीले आफ्नो सेन्दाई संयन्त्रको रियाक्टर नम्बर १ बाट कन्ट्रोल रड हटाएको छ । यहींबाट परमाणु विखण्डन प्रक्रिया सुरु हुनेछ । जापानभरमा विद्युत् कम्पनीले २५ रियाक्टरहरूलाई सुचारु गर्न चासो देखाएका छन् । तर, उनीहरूले नयाँ कडा सुरक्षा नियम पालना गर्नुपर्नेछ ।

क्युसु कम्पनीले नयाँ सुरक्षा उपकरणका लागि १२ करोड डलर खर्च गरेको छ । कम्पनीका अनुसार सेन्दाईको १ नम्बर रियाक्टरबाट सोमबार स्थानीय समयअनुसार साढे १० बजेबाट काम सुरु गरिएको छ । यस रियाक्टरबाट आगामी शुक्रबारदेखि विद्युत् उत्पादन सुरु हुने र आगामी महिनादेखि यसले पूर्ण क्षमताका साथ काम गर्ने अपेक्षा गरिएको छ ।

जापानी प्रधानमन्त्री सिन्जो आवेले सरकार परमाणु रियाक्टरलाई सुचारु गर्न चाहेको उल्लेख गर्दै संसारकै सबैभन्दा कडा सुरक्षा मापदण्डलाई पूरा गर्ने बताएका छन् । तर, जापानीहरूले भने परमाणु ऊर्जा पुन: सुरु गर्न लागिएकोमा विरोध जनाउँदै आएका छन् ।

सन् २०११ को मार्च ११ मा फुकुसिमामा आएको भूकम्प र सुनामीका कारण दाइ–इची प्लान्टमा नोक्सान भएको थियो । भोलिपल्टै यहाँबाट रेडियोधर्मी पदार्थ चुहिन थालेको थियो । यसलाई सन् १९८६ को चेर्नोबिल संकटपछिकै सबैभन्दा ठूलो परमाणु संकट मानिएको थियो ।

 

बेइजिङ, श्रावण २९ -

चीनको उत्तरी बन्दरगाह सहर तियान्जिनमा बुधबार मध्यराति भएको विस्फोटमा ५० जनाको मृत्यु भएको छ ।

बिनहाई न्यु डेभलपमेन्ट जोनमा खतरनाक रासायनिक पदार्थ राखिएको एक गोदाममा विस्फोट भएको हो । यो एक औद्योगिक दुर्घटना भएको अधिकारीहरूको भनाइ छ । सरकारी समाचार एजेन्सी सिन्ह्वाका अनुसार मृतकमा १२ अग्नि नियन्त्रक पनि छन्, ३६ जना बेपत्ता छन् । घटनामा ७ सय १ जना घाइते भएका छन् । तीमध्ये धेरैलाई दुर्घटनाका कारण उछिट्टिएका सिसा र भग्नावशेषबाट चोट लागेको छ । ६६ जनाको अवस्था चिन्ताजनक छ । घटनालगत्तै आगोको ठूलो गोलो केही फिट माथिसम्म देखिएको थियो । घटनास्थलबाट लामो समयसम्म कालो धुवाँ निस्किइरहेको थियो । निर्माण सकेर निर्यातका लागि तयार सयौं कार त्यसमा परेर नष्ट भएका छन् ।  

स्थानीय अस्पताल घाइतेहरूले भरिएका छन् । राजधानी बेइजिङबाट दक्षिण–पश्चिममा पर्ने तियान्जिन चीनको एक मुख्य बन्दरगाह र औद्योगिक नगर हो । राष्ट्रपति सी जिनपिङले दुर्घटनाको कारणबारे अनुसन्धान हुने बताएका छन् । रुसी राष्ट्रपति भ्लादिमिर पुटिनले उक्त घटनाबाट आफू मर्माहत भएको बताएका छन् । चिनियाँ समकक्षी जिनपिङलाई सन्देश पठाउँदै उनले मृतकका परिवारप्रति समवेदना र घाइतेको शीघ्र स्वास्थ्यलाभको कामना गरेका छन् । स्थानीय समयअनुसार बुधबार राति साढे ११ बजे पहिलो विस्फोट भएको थियो । लगत्तै त्यसभन्दा शक्तिशाली विस्फोट भयो । र, शृंखलाबद्ध साना विस्फोट भए । जसका कारण २ किलोमिटर आसपासका भवनका झ्यालहरू बाहिर उछिट्टिएका छन् । ती भवनमा रहेको कार्यालयहरू ध्वस्त भएका छन् । अमेरिकी भौगर्भिक सर्वेका अनुसार धेरै किलोमिटर टाढासम्म विस्फोटको तरंग फैलिएको थियो । शृंखलाबद्ध विस्फोट भूकम्पको धक्काकै रूपमा रेकर्ड भएका छन् ।

पहिलो विस्फोट ३ टन र दोस्रो २१ टन टीएनटी बराबरको रहेको चाइना अर्थक्वेक नेटवर्क सेन्टरले जनाएको छ । ‘विस्फोटलगत्तै ज्यान बचाउन भाग्नुको विकल्प थिएन, भाग्दै गर्दा पनि रगतपच्छे भएँ,’ प्रत्यक्षदर्शी ३८ वर्षीय वु डेजुनले भने । ट्रक चालक चाओ चेन्चेङको भनाइमा परमाणु बम विस्फोट भएजस्तै दृष्य देखिएको थियो । ‘यस्तो होला भनेर भनेर मैले कहिल्यै सोचेको थिइनँ,’ उनले भने, ‘दृष्य जति भयानक थियो, त्यति नै सुन्दर पनि ।’ आप्रवासी कामदारलाई राखिएको शयन कक्षनजिक विस्फोट भएको थियो । ध्वस्त हुँदै गरेको भवनबाट उनीहरू हतारमा निस्किन सफल भए । आवासीय कामदार डान एगियोका अनुसार सुरक्षित स्थलमा पुग्दानपुग्दा दोस्रो विस्फोट भएको थियो । एक सय ४० दमकलका करिब १ हजार अग्नि नियन्त्रक रातभर घटनास्थलमा खटिएका थिए ।

अस्पतालहरूमा घाइतेका लागि रक्तदान गर्ने स्थानीय बासिन्दाको भीड लागेको छ । खतरनाक र विषाक्त रासायनिक पदार्थको कारोबार गर्ने कम्पनी रुइहाईको गोदाममा विस्फोट भएको हो । उक्त कम्पनीका एक जनालाई सोधपुछका लागि नियन्त्रणमा लिइएको सरकारी टेलिभिजन सीसीटीभीले जनाएको छ । मुख्य सडक, आवासीय र कार्यालय रहेको क्षेत्रमा विस्फोटक पदार्थ राखिएकामा चीनभर विरोध भएको छ । समुद्रतटको नगर तियान्जिनमा करिब १ करोड ५० लाख जनसंख्या बसोबास गर्छ ।

बग्दाद, श्रावण २८ - सिया मुसलमान समूदायको बलियो प्रभाव रहेको उत्तरी बग्दाद बजार इलाकामा बिहीबार भएको ट्रक बम विस्फोटमा परी कम्तीमा ५० जनाको मृत्यु भएको सुरक्षा र चिकित्सक स्रोतले जानकारी दिएको छ ।

सदर सहर क्षेत्रमा रहेको तरकारीको थोक बजारमा बिहीबार बिहान सबेरै भएको यो आक्रमण इराकको राजधानीमा भएको यस महिनाकै भीषण आक्रमणको रुपमा रहेको बताइएको छ । यस आक्रमणमा परी अन्य ७४ जना घाइते भएका बताइएको छ ।

थोक तरकारी बजारमा अत्यन्त व्यस्त हुने स्थानीय समयाअनुसार बिहान ६ बजे सो विस्फोटन भएको बताइएको छ ।

यस आक्रमणको हालसम्म कुनै पनि समूहले पनि जिम्मा लिएको छैन । तर सिया मुसलमान समूदायलाई लक्ष्यगरी बारम्बार आक्रमण पनि गर्दै आएका इस्लामिक स्टेट जिहादी समूहले नै यो आक्रमण पनि गराएको अनुमान गरिएको छ ।

इराकको राजधानीदेखि उत्तरपूर्वमा पर्ने दियाला प्रान्तमा भएको विस्फोटको दुई दिन पछाडि पुनः विस्फोट भएको बताइएको छ । दियालामा भएको बम विस्फोटमा परी ३० भन्दा बढी व्यक्तिको मृत्यु भएको थियो ।